أهلا بك , سواء كنت تعمل كمطور أعمال او مدير حملات إعلانية او مسوق رقمى أكيد هيقاابلك أنواع مختلفة من العملاء وانواع مختلفة من المشاريع , مطالب دائماَ بتنويع طرق اللعب وفى بعض الاحيان ان تكون ساحراَ
البشر بشكل عام أنواع مختلفة مشاعرهم وافكارهم وتوجهاتهم بتتأثر بعوامل تانية
فى المقالة دى هنعرض عليك 3 أنواع من العملاء 

عليك أن تحذر وأن تنفذ صفقاتك معهم , مش بقلك ماتتعاملش معاهم . فقط الحذر من النقاط التالية :

النوع الأول : العميل ” فاهم التسويق ”

هتلاقيه بيقلك دايماَ ان بقاله سنين كتير دارس تسويق , وانه خبير بتخصصك , هاتلاقيه بيحاول يعرفك انه مش هاوى ,
وانه متابع التسويق الالكترونى من سنة 2002 وحاجات كده وانه قارى موسوعات كوتلر  .
الحقيقة إن الماركت بيتغير كل يوم .. ف لو حد دارس تسويق رقمى من سنة ونص .. إنهردة هو معلوماته قديمة جداَ
فمابالك بقى باللى بيتكلم عن سنين
إزاى تتعامل معاه : لازم تكون إنت Updated  بالمجال , وف نفس الوقت توصله ده بشكل مش مباشر
لازم تعرفه ان التقنيات بتتغير كل يوم .. وإن طرق اللعب اكيد اتغيرت
قول ليه ف وشه .. ان اكيد انت مش هتجيله عشان تنفذ تقنيات تسويقية من التسعينات او بداية الألفية

النوع الثانى : العميل ” صاحب النظرة ف الهوا ”

فى العموم عليك إنك تحضر دورك ايه .. هل انت مهمتك تزود المبيعات من الإنترنت ؟ ولا مهمتك تعمل إعلانات  ؟ ولا مهمتك تطور المشروع ؟ ولاتسوق بالعمولة ؟ ولا ايه بالظبط ؟

النوع ده من العملاء .. بيكون مش بس بيطلب منك خدمة تسويقية .. لأ كمان بيقلك تعملها إزاى
بيحكيلك حاجات عشان تروح تطبقها .. المعلومات اللى بيقلها مهمة وهتساعدك
بس إنت مش مجبر ابداَ إنك تسمع كلامة وتنفذه لأن إنت المتخصص وممكن جداَ تلاقية بيحلم او واهم .. وان النتايج مش هتيجى من اللى هو بيقوله ..
النوع ده لازم تكسب ثقته .. بس فى نفس الوقت عليك انك تعرف ان انت المايسترو فى مجالك
تقدر تخرج بشياكة من الموقف لو حسيته بيبعد عن اهدافة
” انك هتجرب اكتر من إستراتيجية , وإن اللى هو بيقوله ممكن يكون واحدة منها
بس مش هى الوحيدة ”
او انك تناقشة بشكل مباشر فى النقط اللى بيتكلم فيها
من الاخر هو اتواصل معاك عشان إنت متخصص .. مش عشان تنفذ طلباته

النوع الثالث : العميل ” الحويط “

التسويق فى المقام الأول هو إستثمار .. بعض العملاء بيندهشوا من الأرقام فعلاَ , والبعض بيعمل نفسه مندهش
لما بتقله ان متوسط الميزانية التسويقية 500$ ف البداية
تلاقيه بيحسب هما كام بالمصرى , وبيقلك ليه ده انا شفت شركات بـ2000 ج وبعدين يبتدى يسألك
الاعلان هيروح لكام واحد وايه النتايج اللى هتجيلى والاسئلة النمطية دى …
جاوبه على اسئلته عادى , بس ركز على تغطيه النقاط دى ف كلامك
1- لو هو ناجح فى مجاله الـ500 دولار دى هيصرفها ف اليوم , لأنه بيكسب وده هدفك
2- لو المبلغ بالنسبة ليه كبير فعلاَ , يبقى هو مش جاهز انه يكبر ..
3- طرق التسعير والنتايج بتختلف من مجال لمجال ف متقارنش حاجات انت مش عارف تفاصيلها
4- متهاجمش زميل او شركة تانية فى نفس مجالك

وف الأخر دايماَ خليك مركز مع انواع العملاء دى فى الأرقام
أخرج من الميتينج ملخص النقط والتكاليف المتفق عليها وهتبدئوا إمتى وإزاى
وأكيد متضيعش وقتك فى إجتماعات كتير  لأن دورك اللى بيحصل فى الإنترنت بعدها أهم بكتير
وهو اللى بتعمل منه تأثير فعلاَ .
لو عاوز تعرف إزااى تكون سوشيال ميديا نينجا إقرى المقالة دى